Apil nga imbestigahan sa mga otoridad ang mga rugby boys nga niukopa abandonadong opisina nga nakabase sa Fajares Avenue, Oval Complex, Pagadian City kung asa niulbo ang sunog kagabii. Sa eksklusibo nga interview sa RMN-DXPR Pagadian kang City Desaster Risk Reduction and Management Officer Richard Pabria, lakip sa ilang gisuta ang lugar diin nakapwesto ang mga batang la-aw partikyular sa bakanteng puwesto nga kanhing gi-ukopa sa Department of Interior and Local Government.
Gidugang ni Pabria nga sigon sa mga nakasaksi nagsugod ang kalayo sa gi-pundohan sa mga rugby boys nga menor de edad. Dako ang iyang pasalamat nga wala na makatabok ang kalayo sa opisina sa Parole and Probation Administration, Provincial Department Health Office ug building sa Sangguniang Panlungsod. Mahinumduman nga mobalor 10 milyones ang kabtangan nga naabo nga gilangkuban sa Department of Agrarian Reform at Local Finance Office. Gisugid usab ni City Fire Marshal Dionisio Cayudong nga giisa sa ikaduhang alarma ang sunog ug nadugay sila sa pagpakulong sa kalayo kay gama sa light materials ang building ug nisiaw pa sa pagtayhop ang kusog nga hangin.