Nakaplagan nga nagbitay sa punu-an sa manga nga wala nay kinabuhi ang 29-anyos nga ulitawo didto sa Purok Cadena de Amor, Barangay Kabatan, Vincenzo Sagun, Zamboanga del Sur alas 7:00 kagahapon sa buntag. Sa inisyal nga imbestigasyon sa Vincenzo Sagun MPS, giila ang biktima nga si Rey Coraza Dumpic, residente sa naasoy nga lugar nga nakit-ang patay nga nagbitay sa punuan sa manga nga hiniktan ang liog, 100 metros ang gilay-an gikan sa iyang balay.
Ang personahe sa Rural Health Unit ug kapulisan naglusad sa imbestigasyon ug post mortem examination. Nasayran nga alas 7:00 sa gabii niadtong domingo nananghid ang biktima ngadto sa iyang ginikanan nga molakaw una, kay dunay asikasuhon apan wala kini makabalik hangtud sa tungang gabii rason nga gipangita kini sa iyang pamilya apan pakyas nga makit-an. Nakugang nalang ang pamilya dihang nakit-an kining wala nay kinabuhi nga nagbitay sa kahoy. Sigon sa Rural Health Unit, natook ang biktima gumikan sa kahugot sa pisi nga gihigot sa liog nga niresulta sa iyang kamatayon. Gisuta pa sa mga imbestigador kun wala bay foul play sa hitabo.