Ika-123 nga kamatayon ni Dr. Jose Rizal gihinumdom kagahapong adlawa Nagmalampuson ang kasaulogan sa ika-123 paghinumdom sa kamatayon ni Dr. Jose Rizal nga gipahigayon sa Rizal Park, City Hall Complex dinhi sa syudad sa Pagadian kagahapon sa buntag.
Naghugpong ang mga opisyales ug empleyado sa kagamhanang lokal ning syudad, mga personahe sa 1st Infantry (Tabak) Division, Bureau of Fire Protection, Jail officers, kapulisan, mga magtutudlo ug tinun-an sa nagkadaiyang tulunghaan lakip na ang mga personahe sa DepEd City Division. Nasaksihan sa mga mitambong ang tradisyonal nga wreath laying ceremony, pagpatingog sa siren sa BFP ug ang 21 gun salute.
Sa maong programa, gisaysay ni DepEd City Division Serapion Cabatingan ang kinabuhi ni Dr. Jose Rizal kung giunsa niya ang pakigbatok sa mga colonista hangtud nga gipusil kini sa mga Kastila sa Bagumbayan nga mao na karon ang gitawag nga Luneta Park.
Samtang sa mensahe ni 1st ID Chief of Staff Col Benajmin Batara Jr., gipahinumdom niini ang sakripisyo ug ang pagkamartir ni Dr. Jose Rizal ug sa mga bayani alang sa nasud arun makab-ot ang kagawasan sa mga Pilipino gikan sa kamot sa mga kolonista.
RMN DXPR